kasayuran

Bacteria

2008-09-13T21:35:00.000-07:00

Sayud ba kamo mga higala nga ang bacteria makadaut ug makaayo sa tawo? Kung walay bacteria mga kaigsoonan mangamatay tang tanan pero adunay puy bacteria nga pwede pud mupatay kanato. Nag depende kini mga higala kung maayo o dautan ang maong bacteria. Ang maayong bacteria mga higala mao kadtong atong gikinahanglan aron kita mabuhi. Naa sila aron tabangan ang atong tiyan nga motunaw sa atong mga pagkaon sama sa lacto bacillus nga bacteria. Mopuyo kini sa atong tinai aron motabang sa pagtunaw sa atong mga pagkaon. Aduna puy mga bacteria nga nagpuyo sa atong baba ug atong panit. Kining maong mga bacteria mga higala motabang kanato aron kita protektahan sa mga dautang bacteria nga maoy mohatag kanato ug sakit ug kadaut. Gitawag kining dautang bacteria ug pathogenic bacteria. Mopahimolos kining dautang bacteria aron luyahon ang imong lawas o moatake kini kung daghan kaayo sila kumpara sa imong maayong bacteria.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan.

Taipei 101

2008-09-13T21:32:00.000-07:00

Sayud ba kamo mga higala nga ang pinakataas nga building nga natukod sa tibuok kalibutan mao kining gitawag ug Taipei 101. Human maguba ang world trade center niadtong Septembre 11, 2001. Ang Taipei 101 mga higala mikabat sa 509 metros ang gitas-on niini. Nahabutang kini didto sa Taiwan. Gitawag kini ug Taipei 101 mga higala tungod kay ang mga salog niini mikabat ngadto sa 101 ka salog. Ang pagtukod sa maong building mga kaigsoonan nag sugod niadtong 1999 ug nahuman niadtong 2004. Mikabat sa 1.7 billion US dollars and kantidad niini. Ang maong building mga kaigsoonan anaa niini ang pinakakusog nga elevator sa tibuok kalibutan gitawag kini ug double-decker, adunay 63 km/hr ang gipaspason niini. Ang timbang sa maong building mga higala mikabat usab sa 700,000 toneladas. Ang maong building mga higala mutindog gihapon bisan pa sa pinakakusog nga linog. Adunay pa gayuy mga mall sa unang salog niini paingon sa ikaunom. Ang sunod nga pinakataas na building mga higala mao ang Petronas building sa Malaysia diin aduna lama’y gitas-on nga 452 metros. Pero adunay gitukod ang Dubai nga building gitawag kini ug Burj dubai diin aduna kini gitas-on nga 800 metros. Apan kining maong building mga higala wala pa nahuman mao nga dili pa kini opisyal nga pinakataas nga building sa tibuok kalibutan.
Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan.

Spratly Islands

2008-09-13T21:27:00.000-07:00

Sayud ba kamo mga kaigsoonan nga ang mga isla sa Spratly naglangkob kini ug sobra sa usa ka gatos ka isla. Gipalibutan kini ug halapad nga palaisdaan ug dako nga deposito sa lana, gasolina man o krudo. Usa kini sa mga rason ngano ang mga silingang mga nasud nag ilog niini. Niadtong tuig 1968, nadiskobrehan kining maong deposito sa lana. Gibana-bana kining maong deposito sa lana nga mikabat kini ug 17.7 billion tons kumpara sa Kwait nga mikabat lamang kini ug 13 billion tons. Kung kining maong deposito sa lana maablihan mga kaigsoonan ika-upat kini sa pinakadako nga deposito sa maong lana. Dili ikatingala nga ang mga silingang nasud niini nanag-ilog isip ila nga teritoryo. Ang mga nasud nga nanag-ilog niini mao kini China, Taiwan, ug Vietnam. Ang Malaysia ug ang Pilipinas mga kaigsoonan miangkon lamang ug parti sa maong mga isla ug dili gayud ang kinatibuk-an ang gi-angkon isip teritoryo niini. Daghan kaayo ang mga rason sa tagsa tagsa ka nasud ngano nga miangkon sila niini mga kaigsoonan.

Kini na usab ang inyong higala sa kahanginan si Sol Erwin Diaz muingon nga ang tawon dunay kasayuran adunay padulngan.

Vatican City

2008-09-09T18:16:00.001-07:00

Pinakagamay nga nasud

2008-09-09T18:12:00.000-07:00

Sayud ba kamo mga higala nga kung unsa nga nasud ang pinaka gamay sa tibuok kalibutan? Ang Vatican City mga higala ang pinakagamay nga nasud sa tibuok kalibutan. Aduna lama’y 770 ka lumolopyo niini ug aduna lama’y gidak-on nga 51 hectaryas. Wala’y permanente nga nagpuyo niini. Ang maong nasud gipalibutan kini sa Rome, Italy. Ang ikaduha nga pinakagamay nga nasud mga higala mao ang Monaco nahimutang kini sa Frenc Riveira sa French Mediteranean coast duol sa Nice. Ang maong nasud mga higala aduna lama’y 32,000 ka lumolopyo, mas daghan pa ang lomolopyo diri sa ciudad sa Iligan ug aduna lama’y gidak-on nga 181 hectarias. Ang ikatulo nga pinakagamay nga nasud mga higala mao ang nasud sa Nauru nga adunay lama’y gidak-on nga 2201 ka hectarias ug aduna lama’y 13000 ka lumolopyo. Ang Ikaupat nga pinakagamay nga nasud mga higala mao ang Tuvalu nga aduna lama’y gidak-on nga 2330 ka hectarias. Nahamutang kini haduol sa Polynesia ug aduna lama’y 12000 ka lomolopyo. Ang Ikalima nga pinakagamay nga nasud mga higala mao ang San Marino, aduna lama’y 6215 hectarias ug aduna lama’y 29000 ka lumolopyo. Ang maong nasud mga higala nahimotang kini North Central Italy.
Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Danghan Salamat.

Pinakadatu nga tawo sa tibuok kalibutan

2008-09-09T18:08:00.000-07:00

Sayud ba kamo mga higala kung kinsa ang pinaka kwartahan nga tawo sa tibuok kalibutan? Kini pagaranggohon sa FORBES Magazine mga higala didto sa Estados Unidos. Sa tuig 2007 mga higala ang pinaka kwartahan nagpabiling gihapon nga si Bill Gates, usa ka amerikano ug ang iyang kwarta ug kabtangan mikabat kini sa 56 billiones dolyares. Ang Negosyo ni Bill Gates mao ang Microsoft. Ang ikaduhang pinaka kwartahan mao si Warren Buffett usa usab ka amerikano. Ang iyang kwarta ug kabtangan mikabat kini sa 52 billiones dolyares. Ang ikatulo nga pinakakwartahan mao si Carlos Slim Helu sa mexico diin ang iyang kwarta ug kabtangan mikabat kini sa 49 billiones dolyares. Ang ikaupat nga pinakakwartahan mao Ingvar Kamprad sa Sweden ang iyang kwarta ug kabtangan mikabat sa 33 biliones dolyares. Ang Ika lima nga pinakakwartahan mao si Lakshmi Mittal sa India ang iyang kwarta ug kabtangan mikabat kini sa 32 billiones Dolyares. Ang ika-unom mga higala nga pikakwartahan mao si Sheldon Adelson sa amerika nga adunay kawarta ug kabtangan nga 26.5 billiones dolyares. Ang ika pito mga higala mao si Bernard Arnault sa France nga adunay kawarta ug kabtangan nga 26 billiones dolyares. Ang Ikawalo mga higala nga pinakakawartahan mao si Amancio Ortega sa Espana, ang iyang kwata ug kabtangan mikabat sa 24 billiones dolyares. Ang ikasyam mga kaigsoonan mao si Li Ka-shing sa hongkong ug ang iyang kabtangan mga higala mikabat sa 23 billiones dolyares. Ug ang ika napulo nga pinakakawartahan mao si David Thomson sa Canada ug ang iyang kawarta ug kabtangan mikabat sa 22 billones dolyares.
Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Danghan Salamat.

Pinakamahal nga Celphone

2008-09-09T18:06:00.000-07:00

Sayud ba kamo mga higala nga ang pinakamahal nga celphone sa tibuok kalibutan mikabat kini ug kantidad nga 1.3 milliones dolyares o 53 milyones ka pesos. Ang Diamond Crypto Smartphone gibuhat kini ni Peter Alloison . Nganong mahal man kini kaayo mga higala? Gawas sa iyang platinum nga lawas ang casing niini gitakloban ug 50 ka diamante lakip na niini ang talagsaong napulo ka asul nga diamante. Maski gani ang logo nga ANCort ug ang iyang mga keypads mga bulawan nga 18 ka karat. Kining maong smartphone susama lang gihapon sa mga ordenaryong celphone ang mga kagawian niini. Gipadagan kini sa windows ug adunay taas nga resolution ang camera niini, makatext ug maka tawag, maka-internet ug gisuportahan kini ug java ug wap. Ang laing pinakamahal nga celphone mga higala mao kining “Le Million de la Nuit” nga mikabat ug usa ka milliones dolyares o 40 millioyones ka pesos, ang Swedish Smartphone nga mikantidad kini ug 300,000 dolyares o 12 milliyones ka pesos, ang Motorola SLVR L7 diamond Mobile phone nga mikantidad kini ug 75,000 dolyares o tres milliones ka pesos ug ang Nokia Vertu Luxury Phone nga mikantidad kini ug 10,000 dolyares o 400,000 ka pesos. Susama sa kotse mga higala daghan ang mga kaluhoan sa celphone sa merkado sa mga electronic device.
Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Danghan Salamat.

EDSA Revolution

2008-09-09T18:00:00.000-07:00

Sayud ba kamo mga kaigsoonan nga tulo na ka EDSA revolution ang nahitabo sa kasaysayan sa Pilipinas? Ang EDSA mga kaigsoonan mao kini ang Pulong nga gikan sa Ngalan nga Epifanion De los Santos Avenue usa sa mga pinakadako nga dalan sa Metro Manila. Diin didto kini gibuhat ang tulo ka revolution.
Ang unang revolution mga higala mao kadtong EDSA revolution nga nahitabo niadtong 1986 diin gipalagpot si kanhiay nga presidente Ferdinand Marcos. Ang maong revolution mga higala usa ka sunod sunod nga dili bayolente ug maampoon nga panagdugok sa katawhan aron protestahan ang diktadoryang administrasyon ni Marcos nga mikabat na sa 20 ka tuig. Ang mga katawhan nga miuban sa maong protesta mikabat kini sa 200,000. Si Marcos niadtong tungora midali paglayas sa Malacanang ug miadto gilayon sa Hawaii ug gipulihan sya ni Presidente Corazon Aquino.
Ang ikaduhang revolution mga higala mao kadtong revolution nga mitumba sa kagamhanang Estrada niadtong 2001 ug matud pa usa usab kini ka malinawong protesta ug malinawong minaug si Presidente Estrada gikan sa Malacanang ug gipulihan sya sa iyang bese Presidente nga kasamtangan karon nga Presidente ug matud pa daghan ang wala nag-ila kaniya isip presidente tungod sa kontrobersya sa helo garci scandal nga maoy mutumpok nga sya midaya panahon sa Election niadtong tuig 2004.
Ang ikatulong revolution mga higala mao kadtong revolution sa EDSA nga mikadlit sa dihang si Joseph Estrada arestohon upat ka bulan human sa iyang pagkanaug gikan sa Malacanang. Gibuhat ang maong revolution sa mga supporters ni Joseph Estrada pero pakyas sila sa pagpakanaug kang Gloria Macapagal Arroyo tungod sa iyang pag deklarar ug state of Rebellion diin matud pa illegal ang maong pagdeklarar tungod kay wala kini nahisubay sa balaod.
Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Danghan Salamat.

Legal nga Bakak

2008-09-05T22:34:00.002-07:00

Sayud ba kamo mga higala nga adunay dapit sa pilipinas nga ang pagpamakak usa ka legal? Asa man kining lugara mga higala? Ang dapit diin ang pagpamakak usa ka legal mga higala mao ang senado ug ang congresso. Ang balaod mismo sa konstitusyon ang naghatag kanila ug katungod niini. Matud pa sa konstitusyon “wala’y membro sa congresso ug senado nga ma-question o mapahamtangan ba kaha ug silot sa diing dapit sa senado o sa congresso o sa mga komitiba niini panahon nga sya muhatag ug mongkahi o debate”. Sa ato pa mga kaigsoonan, maski ug unsa ang iya isulti sulod sa kongresso o senado maski pa ug bakak kini dili sya mapahamtanga ug silot niini tungod kay katungod kini nga gimando sa batakang balaod. Mao ang congresso ug senado dili lamang dapit sa mga buaya kun dili dapit usab sa mga bakakon.
KIni na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghan salamat.

Kontrobersya nga Giatubang ni Gloria

2008-09-05T22:34:00.001-07:00

Sayud ba kamo mga higala kung pila na ka kontrobersya ang naatubang sa Pamilyang arroyo panahon sa iyang administrasyon? 18 kabuok mga higala lakip na niini ang sa pagkakaron nga kontrobersya sa ZTE Broadband deal.
Atong ibatbat mga higala.
Una, ang IMPSA (Industrias Metalurgicas Pescarmona Sociedad Anonima) Hydro-electric Power Plant $14 M kickback, kadtong giyagyag ni Mark Jimenez. Ikaduha, Jose Pidal Bank Account nga mikabat sa P321 M. Ikatulo, kadtong bahandi nga gitaguan sa San Francisco nga mikabat sa $7.1 M. Ikaupat, ang mga kabayo ni Mikey Arroyo nga gikan pa gayud sa gawas sa nasud nga mikabat and presyo niini sa milliones ka pesos. Ikalima, ang President Diosdado Macapagal Boulevard nga sobra ang pagpresyo niini sa P536M. Ikaunom ang NAIA 3/PIATCo nga kontrata adunay anomalya nga mikabat ug $100M nga kickback. Ikapito ang PAGCOR nga gitawag ug cash cow expose. Ikawalo, ang Jancom Environment Contract nga anomalya ug sobrang presyo. Ikasyam, Agricultura nga pundo nga mikabat ug P728 M sa Ginintuang Masaganang Ani gigamit para sa pundo sa kampanya sa election. Ikapulo, PHILHEALTH cards nga gigamit sa kampanya. Ikaunsi, kadtong Manny Pacquiao Las Vegas Suite nga mikabat sa $20,000 sa matag gabii gigamit kini ni FG Mike Arroyo. Ikadusi, operation sa Jueteng pinaagi Bong Pineda. Ikatrese, kurakot nga contrata ni Norberto Gonzales. Ikakatorse, JocJoc Bolante fertilizer scam. Ikakense, Comelec Automated Counting Machine scandal. Ika desesays, hello garci scandal, pagpanikas panahon sa election 2004 ug 2007. Ikadesiete, extrajudicial killings. Ug karon ang ZTE broad band deal.
KIni na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghan salamat.

ZTE Broadband Deal

2008-09-05T22:31:00.000-07:00

Sayud ba kamo mga higala kung unsa kining gitawag ug ZTE Broadband deal? Ang ZTE mga higala nag tindog kini sa kumpanya sa China nga Zhong Xing Telecommunications Equipment Limited. Ang ZTE broadband deal mao kini ang kontrobersya nga kontrata sa gobyernong arroyo nga mikabat ug 329 milliones dolyares ngadto sa gubyernong china. Gisaksihan mismo ni Presidente arroyo didto sa china ang pagpirmahay niini niadtong abril 2007. Ang National broadband network deal mga higala una kining gitanyag sa Department of Transportation and communication kun DOTC nga nagsugod pa niadtong 2005 sa tuyo nga mabutangan ug internet connection ang tanang local government ug uban pang agencia sa gubyerno. Apan gikataho nga nawala ang maong kontrata ug matud pa sa National Bureau of Investigation nga gikawat kini. Mao nga niusab pagbuhat ug contrata pagkasunod bulan ug gipirmahan sa Secretary sa DOTC nga si Leandro Mendoza ug ang ZTE. Apan pag Septembre 2007 mga higala ang korte suprema mipagawas ug Temporary restraining order aron dili ma imposar ang maong kontrata tungod kay gi-question kini ni Vice Gobernor sa Iloilo nga si Rolex Suplico tungod kay wala kuno kini miagi sa sakto nga processo.
ug migawas si Joey De Venecia ang Tag-iya sa Amsterdam Holding Inc. ang napildi nga korporation sa bidding ug iyang gibulgar nga ang maong kontrata sobra sa presyo. Ang Amsterdam Holding mao unta ang mudala sa proyekto pinaagi sa BOT kun build-operate-and-transfer scheme aron dili na mangutang ang gobyerno sa pilipinas ngadto sa china. Misubra kuno kini sa 130 milliones dolyares ug didto kuhaon sa pagpangutang nga adunay interes sa Gubyerno Pilipinas ngadto sa China. Ang tao kuno nga nagpatunga niini mao si Benjamin abalos ang pangulo sa Comelec kaniadto ug naglambigit kini kang First Gentleman Mike Arroyo. Kining tanan mga higala nakonpirma sa bugtong nga testigo nga si Jun Lozada ang consultant sa maong proyekto.
KIni na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghan salamat.

Kuaresma

2008-09-05T22:30:00.000-07:00

Sayud ba kamo mga kaigsoonan nga ang kinabag-ang kristiano nagsaulog karon ug kuaresma? Nag sugod kini karong adlawa February 6, ug ang maong adlaw gitawag kini ug mierkules sa badles. Ang kuaresma mga kaigsoonan usa usab kini ka 40 ka adlaw diin ang mga kristiano magpuasa sa dili pa ang domingo sa pagkabanhaw. Ang kuarenta ka mga adlaw nagrepresentar kini sa pag gahin ni Jesu Kristo didto sa desierto aron mag ampo ug magpuasa diin matud pa sa bibliya gitintal si Jesus sa yawa ug iyang nalabyan ang tanang pagtintal. Ang naglahilahi nga simbahan mga kaigsoonan gikwenta ang 40 ka adlaw sa lain lain nga paagi.
Ang tuyo sa kuaresma mga kaigsoonan mao ang pag preparar sa mga kristyano pinaagi sa pag-ampo, penetensya, paghatag ug mga limos ug pagsaulog aron hinumduman ang pagkamatay ug pagkabanhaw sa atong Ginoong Jesus ug didto kini isaulog panahon sa semana santa. Hinumduman ning maong semana santa mga kaigsoonan ang paglutos ni kristo hangtud sa byiernes santo ug taposon kini didto sa dominggo sa pagkabanhaw.
KIni na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghan salamat.

Valentine’s Day

2008-09-05T22:27:00.000-07:00

Sayud ba kamo mga kaigsoonan nga ang sinugdanan sa Valentines day nagagikan kini sa kang sto. Valentine. Si Sto. Valentine usa ka romano katoliko nga nagpakamartir aron lang dili nya isurender ang iyang pagkakristyano. Namatay sya niadtong Februaro 14, 269 A.D. Sa susasamang adlaw gipahinungod ang mga ripa sa gugma. Ang kasugiran usab nagaingon nga si sto. Valentino nagbilin ug sulat panamilit sa anak sa usa ka tigbilanggo nga iyang naamigo ug gibutangan sa katapusan sa maong sulat “gikan sa imong valentine”. Sukad niadto ang sulat nga dunay “gikan sa imong valentino” nahimo kining tatak sa sulat sa panag amigohay. Gideklarar ni Papa Gelasius 496 A.D. nga itahud ang February 14 sa kang sto. Valentine. Ug sa hinayhinay ang maong adlaw nahimong panagbaloay ug sulat sa panaghigugmaay ug si sto. Valentine nahimong santos sa mga nagkahigugmaay. Ug namahimo pa gayud ang maong adlaw nga marka sa pag padala ug tula, bulak, ug mga regalo. Labi na gayud sa panahon sa mga panagtagbo.
KIni na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghan salamat.

911 attack

2008-09-05T22:24:00.000-07:00

Sayud ba kamo mga kaigsoonan kun unsa kining 911 attack? Ang 911 attack mga kaigsoon mao kini ang ataki sa mga al qaeda didto America niadtong September 11, 2001. Ang 9 nagrepresentar sa bulan nga septeber ug 11 nag representar sa adlaw nga petsa unsi. Niadtong panahona mga kaigsoonan adunay sunod sunod nga paghiguk nga ataki batuk sa America. Ang grupo sa mga al queda ning high jack ug upat ka eroplanong de pasaherohan. Ug ang kada grupo sa mga highjackers ning agi kini ug panagbansay sa pagka piloto. Ang duha ka eroplano gituyo kini paghagba sa world trade center. Ang mga eroplano nga American Airlines flight 11 ug ang eroplano nga United airlines flight 175. Tungod kay ang world trade center didto sa new York duruha man ka odipisyo, gitagsaan kini sa duha ka eroplano ug miresulta sa pagkahugno niini ug midamyos pa gayud ug mga kadaut sa mga silingang odipisyo. Ang ikatulo nga eroplano mao ang American airlines flight 77 gihagba usab kini didto sa pentagon. Ang ika-upat nga eroplano mao ang United airlines flight 73 misukol ang mga empleyado ug mga pasahero mao nga didto kini nahagba sa hawanan shanksvilee, sa Pennsylvania. Gawas sa 19 ka highjacker nga namatay nangamatay usaba ang 2973 ka tawo nga pasahero ug mga nagtrabaho sa maong mga edipisyo. Aduna pa gayu’y usa ka namatay tungod sa sakit sa baga tungod sa abug sa maong pagkahugno sa WTC ug 24 pa ang nangawala ug giisip nalang kini nga nangamatay na.
KIni na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghan salamat.

Council for Philippine Affairs

2008-09-05T22:14:00.001-07:00

Sayud ba kamo mga kaigsoonan nga ang Council for Philippine Affairs kun COPA gibasul ang atong gubyerno sa pagpalayo sa atong mga imbentor pagawas sa atong nasud? Ang atong mga imbentor mga kaigsoonan mugawas sa laing nasud kay daghan kaayong mga dili muotoo kanila. Upat ka kaso ang gipakita sa COPA mga kaigsoonan.
Una, si Ben Santos mga kaigsoonan imbentor sa gitawag ug “Zero oil waste recycling” gituki sa Economic Intelligence and Investigation Bureau tungod sa gitaho nga iya kunong isabotahe ang economiya sa pilipinas.
Ikaduha mga kaigsoonan, si Rudy Arambolo imbentor sa double impact nga bala gitawag kini ug multi-shock bullet, pakyas siya sa pagkumbesi sa PNP ug sa AFP aron paliton ang iyang giimbento.
Ikatulo mga kaigsoonan, si Johnson Fong, nag imbento sa carbonless paper iya sa nga gidala ang iyang giimbento sa laing nasud ug giusab ang label niini ug gibalik sa Pilipinas aron paliton sa mga Filipino.
Ikaupat mga kaigsoonan, Roberto del Rosario nag imbento sa sestema sa sing along iyang gipakigbisogan ang iyang katungod nga siya ang nag imbento sa Karaoke diin ang mga Filipino nagtuo nga giimbento kini sa mga hapon. Ang Pilipinas mga higala ikaduha nga pumapalita’y ug karaoke sa tibuok kalibutan pero si Del Rosario wala’y nadawat maski usa ka dako nga bahin niini tungod kay hangtud karon wala pa niya nakumbensi nga siya gayud ang imbentor sa karaoke.
Mao kini ang trabaho sa mentalidad nga colonial mga kaigsoonan. Nagpakita lamang ang mga Filipino wala’y salig sa ilang kaugalingon. Ang atong kaugalingon ang pinakakuyaw nato nga kaaway.
Kini na usab ang inyong higala sa kahanginan si sol Erwin diaz muingon nga ang tawong dunay kasayuran adunay padulngan. Daghang salamat.

Agapito Flores

2008-09-05T22:09:00.000-07:00

Sayud ba kamo mga kaigsoonan nga kadaghanan sa mga Filipino mitoo nga ang nag imbento sa Fluorescent nga suga mao si Agapito Flores. Nagatuo pa gyud ang uban nga ang pangalang Flourescent nagagikan kini sa apelyedo ni Flores. Si Agapito Flores mga kaigsoonan natawo didto sa bantayan cebu. Pero matud pa ang fluorescent nga suga wala kini naimbento sa susamang tuig. Mao daw kini ang produkto sa 79 ka tuig nga nga pagtuon sa suga nga gisugdan sa kumpanya sa General Electric gikan sa suga nga giimbento ni Thomas Edison.
Dili lamang si Agapito Flores ang miangkon nga siya ang nagimbento sa fluorescent nga suga. Daghan pa. Si A. E. Becquerel sa tuig 1867, sila si Nikola Tesla, Albert Hall sa tuig 1927, sila Mark Winsor ug Edmund Germer ug ang frances nga imbentor nga si Andre Claude nga giila nga nagbuhat ug tubo nga suga pero wala siya giila nga siya ang imbento sa fluorescent nga suga. Gitaho nga ang white Westinghouse ug General Electric nakakuha sa iyang patent nga katungod ug milambo kini ug giila karon nga fluorescent.
Kini na usab ang inyong higala sa kahanginan si sol Erwin diaz muingon nga ang tawong dunay kasayuran adunay padulngan. Daghang salamat.

Manny Pacquiao

2008-09-05T22:01:00.000-07:00

Sayud ba kamo mga kaigsoonan kung kinsa gayud si Manny Pacquiao? Ang tinuod nga pangalan ni many pacquiao mga kaigsoonan mao ang Emmanuel Dapidran Pacquiao. Natawo sya niadtong December 17, 1978 didto sa kibawe, bukidnon apan didto nagdako sa ciudad sa General Santos. Misulod si Manny sa boxing profession niadtong tuig 1995 sa timbang nga 106 pounds lamang sa light flyweight division sa edad nga 16. Ang kasagara nga away ni manny paquiao mga kaigsoonan diha lamang sa mga gagmay’ng dapit. Misikat siya sa dihang iyang gipildi si Edmund Ignacio sa ikaupat nga round niadtong enero 22, 1995 didto sa dula nga blow by blow.
Hangtud nga mipataas si paquiao sa iyang timbang gikan sa 106 paingon sa 113 ka pounds mga kaigsoonan. Sa iyang pagpataas sa iyang timbang mga kaigsoonan napildi sya sa iyang ika 12 nga away sa iyang kontra nga si Rustico Torrecampo. Tungod niini mipuyo siya sa iyang timbang sa 112 ka pounds. Sa pagpuyo niya sa iyang timbag sa 112 mihakut si paquiao ug medalyo ug bakus. Nakuha niya ang titulo WBC Flyweight. Misaka na usab siya ug timbang ngadto sa 122 ka pounds ug nakuha na usab ang titulo sa WBC International Super Bantamweight. Lima ka beses niya gidependahan ning maong titulo mga kaigsoonan. Hangtud nga midula siya sa IBF international super bantamweight ug midaug na pud sa maong division. Giila usab si pacquiao ug pacman. Ug gitaho nga hangtud karon anaa pa ang iyang kaikag sa politika human siya napildi niadtong miaging election sa pagka congresista.
Kini na usab ang inyong higala sa kahanginan si sol Erwin diaz muingon nga ang tawong dunay kasayuran adunay padulngan. Daghang salamat.

Dengue Fever

2008-09-05T21:57:00.000-07:00

Sayud ba kamo mga kaigsoonan kung unsa kining dengue fever? Ang dengue fever mga kaigsoonan mao kining usa ka sakit nga ang hinungdan niini mao ang usa ka virus nga gidala sa usa ka lamok. Ang tao nga mataptan niini mga kaigsoonan kasagara magasugod sa kalit nga pagdaut sa biktima ug sundan gilayon ug panakit sa ulo, hilanat, panakit sa mga kalutahan ug daghan ug pula pula sa lawas. Atakihon ang tawo niini labi na gayud kadtong menus ug resistensya.
Ang maong virus mga kaigsoonanan, musakay kini sa lamok nga Aedes aegypti dayon mubalhin sa tao kung ang maong lamok mupahit kanimo. Mudaghan ang maong lamok panahon sa ting-ulan ug didto kini mangitlog sa mga bulak nga dunay tubig nga napundo, mga abli nga mga pundohanan sa tubig, labi na gayud sa mga plastic bag, mga ligid nga guma ug uban pang mga masudlan ug tubig.
Busa mga kaigsoonan gikinahanglan gayud nga protektahan nato ang atong kaugalingon sa dengue fever pinaagi sa pagpanglimpyo sa palibot, pagatakloban ang mga sudlanan ug tubig o i-screen ba kaha ang atong panimalay.
Kini na usab ang inyong higala sa kahanginan si sol Erwin diaz muingon nga ang tawong dunay kasayuran adunay padulngan. Daghang salamat.

Mother Teresa of Calcutta

2008-09-05T21:55:00.000-07:00

Sayud ba kamo mga kaigsoonan nga ang tinuod nga pangalan ni Mother Teresa of Calcutta mao ang pangalan nga Agnes? Agnes Gonxha Bojaxhiu ang kumpletong pangalan ni Mother teresa. Natawo sya didto sa Skopje, ang ciudad capital sa republic of Macedonia niadtong Agusto 26, 1910. Sya ang kamanghurang anak nila ni Nikola ug Dranafile Bojaxhiu. Gikan sa lungsod Shkodër, sa Albania. Si Nikola ang amahan ni mother Teresa naglambigit kini sa politika. Niadtong 1919 pagkahuman gayud sa panagtagbo sa grupo pulitika kalit lang nahagba si Nikola ug namatay kini. Niadtong panahuna si mother Teresa 8 anyos pa lamang ug ang nagbuhi kaniya sukad namatay ang iyang amahan mao lamang ang iyang inahan nga si Dranafile. Samtang sa gamay pang bata si Agnes nadani na sya sa mga kinabuhi sa mga misyonaryo. Samtang nag edad na sya ug 12 anyos misalig na siya sa iyang kaugalingon nga mosulod sa pagkarelihiyuso. Pag edad niya ug 18 anyos mibiya na sya sa ilang panimalay ug misulod sa congregation sa sisters of loreto aron mamahimong misyonaryo ug wala na gayud niya nakita pag usab ang iyang inahan ug igsoon.
Niadtong September 10, 1946 mibiya sya sa kumbento sa sisters of loreto ug mihatag ug mission sa mga masakiton. Miuban gayud sya pagpuyo sa mga masakiton aron mahatagan gayud niya ug dretsu nga serbisyo. Mikaplag sya sa missionaries of charity didto sa kalkutta niadtong tuig 1950. Nakita gilayon ang iyang mga lihuk sa gobyerno ug miani kini ug daghang mga pagdayeg. Niadtong tuig 1979 midawat sya ug Nobel peace Prize sa iyang humanitarian nga mga lihuk. Namatay sya niadtong September 5, 1997 ug gi beatify ni Pope John Paul II ug gihatagan ug titulo nga Blessed Teresa of Calcutta.
Kini na usab ang inyong higala sa kahanginan si sol Erwin diaz muingon nga ang tawong dunay kasayuran adunay padulngan. Daghang salamat.

Antioxidants

2008-09-05T21:53:00.000-07:00

Sayud ba kamo mga kaigsoonan kung unsa kining gitawag ug anti-oxidants? Ang antioxidant mga kaigsoonan mao kining mga sustansya nga gikan sa atong pagkaon nga magpugong sa damyos o kadaut sa atong lawas. Sa dihang ang atong lawas mugamit ug oxygen mga kaigsoonan automatic kini nga magbuhat ug free radicals nga mudaot sa atong lawas. Ang antioxidants mga kaigsoonan mao ang muhagdaw sa mga free radicals nga mudaot sa atong lawas ug sya gilayon ang muayo sa mga kadaut nga gibuhat sa free radicals. Ang mga problema sa panglawas sama sa sakit sa kasingkasing, diabetes, cancer ug uban pa, mao kanaa ang kadaut nga gibuhat sa mga free radicals. Matud pa sa usa ka pagtuon ang pagkaon ug mga frutas ug mga gulay sa matag adlaw mupaubos kini ug 25 porcento sa risgo sa ataki sa kasingkasing o stroke, cancer ug ubang pang infection.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

Ciudad sa Biblia

2008-09-05T21:45:00.000-07:00

Sayud ba kamo mga kaigsoonan nga adunay mga ciudad nga gisulti sa bibliya nga hangtud karon nagpadayon pa? Sayud ba kamo unsa nga ciudad ang gipuy-an ni Jacob sa dihang gipadala si Jose sa iyang pamilya ngadto sa ehepto? Mao kining Beersheba karon giila nga usa ka capital sa Negev. Aduna usab usa ka ciudad sa bibliya nga giconsiderar sa pagkakaron nga ang pinakakaraan ug gipadayon gipuy-an sa kadaghanan. Mao kining ciudad sa Damascus ang ciudad capital sa Syria. Ang Damascus mga kaigsoonan mao usab ang ciudad diin gipadpad si Pablo aron bisitahon si Jesus. Sa laing bahin mga kaigsoonan, ang Bethany mao ang dapit diin si Jesus gibayaw sa kahitas-an, ang Bethany mga kaigsoonan duha lamang ka milya gikan sa Jerusalem.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

Iro nga dili mupaghot

2008-09-05T21:41:00.000-07:00

Sayud ba kamo mga kaigsoonan nga adunay iro nga dili mupaghot? Unsa man kining iroa mga kaigsoonan? Ang klasi sa iro nga dili mupaghot mao kining iro nga gitawag ug basenji. Nagagikan kini sa conteninte sa Africa apan didto kini musikat sa North America. Gisugdan kini mga higala sa pag buhi sa tao sulod sa panimalay sugod pa niadtong libo ka libo na ka katuigan ang milabay. Ang basenji mga kaigsoonan igo lamang kini magmugna ug dili kasagaraan nga tingog sa iro tungod kay lahi kuno ang iyang tutunlan niini kompara sa laing iro. Kining iroa mga kaigsoonan nailhan usab sa ngalan nga “voiceless dog” o walay tingog nga iro. Apan mga higala kining iroa kaantigo pud diay muawat awat sa tingog sa ubang iro.

Sa laing bahin mga higala ang Guiness World book of Records miingon nga ang pinakagamay nga iro sa tibuok kalibuntan mao kining iro nga Chihuahua. Tag-as ug balahibo ang gipasabot Guiness world book of records nga Chihuahua mga kaigsoonan. Gitawag usab kini ug Danka.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

High Blood Pressure

2008-09-05T21:38:00.000-07:00

Sayud ba kamo mga kaigsoonan unsa kining High Blood Pressure o Hypertension? Ang blood pressure mga kaigsoonan mao kining pwersa sa imong dugo diha sa imong ugat sa dihang mopitik ug magpahuway ang imong kasingkasing. Ang Highblood pressure mao kining giingon sa mga hamtong nga kung ang imong pressure sa dugo mulapas kini ug 140 ug ang pressure sa ubos niini 90 pataas.
Ang High blood pressure mga kaigsoonan mupataas sa risgo sa pagkasakit sa kasingkasing nga mupaingon sa ataki sa kasingkasing o stroke.
Walay gipili ang high blood pressure mga kaigsoonan. Pwede kining muataki sa mga bata o mga hamtong. Apan kumon kini sa mga nag edad na ug 35 pataas. Ang high blood pressure mga kaigsoonan kusog kaayo kini dili lamang sa Pilipinas apan ngadto usab sa laing nasud labi na gayud sa mga tigulang, mga tambok, kusog muinom ug mga bino, sa mga babaye nga nag-inom ug birth control pills, sa mga dunay kaliwat niini, sa mga diabetic, ug sa mga dunay sakit sa kidney.
Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

Ejercisyo

2008-09-05T17:57:00.001-07:00

Sayud ba kamo mga kaigsoonan nga ang pagkaon ug peppermint o halang nga timpla samtang ikaw nag-ejersisyo o nagpasingot makatabang kini sa pagpaprisko sa imo lawas? Ug makadugang pa gayud sa enerhiya sa imong lawas. Maski ug 10 minutos lamang ang imong pagpasingot sa matag adlaw dako na kaayo kini ug tabang sa imong maayong panglawas apan ang mga medical associations mitambag nga kinahanglan nga dili moubos sa 30 minutos ang imong pag ejersisyo sa matag adlaw. Ang maayong balita mga kaigsoonan mao nga dili nimo kinahanglan nga hutdon deretsu ang 30 minutos nga ejesisyo sa matag adlaw. Pwede nimong hinayhinayon. Pwede ka mag ehersisyo ug 10 minutos sa buntag, 10 minutos sa udto, ug 10 minutos sa hapon. Dako na kaayo kining tabang sa pagpalambo sa imong maayong panglawas labi na gawas ug ubanan nimo kini ug makalingaw nga aktibidades sama sa paglakaw, pagbisiklita, pagsayaw, ug uban pa.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

Love Bug

2008-09-05T17:55:00.001-07:00

Sayud ba kamo mga kaigsoonan nga niadtong mayo 2000 adunay usa ka virus sa computer nga mikoyanap sa tibuok kalibutan? Gitawag kini ug Love Bug tungod kay gipasa kini pinaagi sa email ug ang nahabutang sa email mao ang pulong nga “I love you” aron ang tag-iya muabli gilayon sa iyang sulat diha sa internet ug dretsuon gilayon ug takud ang iyang computer. Ang maong virus mga kaigsoonan gitawag kinig pinakadautang virus nga nabuhat tungod kay midamyos kini ug million million ka mga computer files ug misangkot pa gayud sa kadaut sobra sa $10billions. Dili unta kini dako nga balita sa Pilipinas kung dili lang tungod nga ang nagbuhat niini usa ka Pilipino. Usa ka estudyante sa AMA computer college didto sa kaulohan. Sayod ba kamo kung kinsa kining tawhana? Nailhan Sya nga si Onel De Guzman.
Kini na usab ang inyong higala sa kahanginan si Sol Diaz muingon nga ang tawong dunay kasayuran adunay padulngan. Daghang Salamat.

Mga Presidente sa Pilipinas

2008-09-05T17:54:00.001-07:00

Sayud ba kamo mga kaigsoonan nga unom ka bise presidente nanahimong presidente. Atong nganlan mga kaigsoonan, Sergio Osmena, Elpidio Quirino, Carlos Garcia, Diosdado Macapagal, Joseph Estrada ug si Gloria Macapagal-Arroyo.
Sa laing bahin mga kaigsoonan, aduna usab tulo ka presidente sa senado nga nahimong presidente ato usab nga nganlan, Manuel Quezon, Manuel Roxas, ug si Ferdinand Marcos.
Adunay pa gayuy duha ka speaker of the house nga nahimo presidente atong usab nga nganlan Sergio Osmena Sr. ug si Manuel Roxas.
Sa laing bahin na usab dunay tulo ka presidente nga namatay panahon sa ilang pwesto. Si Manuel Quezon namatay didto sa New York City niadtong August 1, 1944, Si manuel Roxas namatay sa heart attack April 15, 1948 ug si Ramon Magsaysay namatay niadtong sa accidente sa eroplano niadtong march 17, 1957.
Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

50 ka tuig nga mayor

2008-09-05T17:50:00.000-07:00

Sayod ba kamo mga kaigsoonan nga dunay usa ka mayor nga miserbisyo duol sa 50 ka tuig? Wala pa’y nakabuak ning maong record mga kaigsoonan. Si Mayor Pablo Cuneta ang amahan sa sikat nga artista nga si Sharon Cuneta namatay sa edad nga 90 niadtong September 27, 2000 human sya miserbisyo sa gobyerno sulod sa 50 ka tuig. Niadtong 1947 gi-tudlo sya isip usa ka bese mayor sa Pasay city ni Presidente Elpedio Quirino. Niadtong 1955 sya napili isip mayor hangtud niadtong 1967 human niya napildi si Jovito Claudio sa pagkamayor. Hangtud nagpapili pag usab pagkamayor niadtong tuig 1972 ug misirbisyo hangtud niadtong tuig 1986 sa dihang gipalagpot sya sa pwesto panahon ni pres. Cory Aquino. Apan nagpapili na usab niadtong 1988 ug midaug ug misirbisyo sa walay putol hangtud niadtong galuya na sya sa tuig 1997 ug midawat sa award sa ika50 ka tuig nga panirbisyo.
Grabe mga kaigsoonan nga panirbisyo.
Kini na usab ang inyong higala sa kahanginan si Sol Diaz muingon nga ang tawong dunay kasayuran adunay padulngan. Daghang Salamat.

Arroyo ug Sukarnoputri

2008-09-05T17:48:00.001-07:00

Sayud ba kamo mga kaigsoonan nga si Gloria Macapagal Arroyo ug si Megawati Sukarnoputri sa Indonesia adunay silay kaparihasan. Ania ang ilang kaparihasan: Pariha silang duha babaye ug 54 anyos, nagserbisyo sila isip bese presidente ayha sila nahimong presidente, ang ilang gipulihan nga presidente puros gipalagpot sa pwesto niadtong tuig 2001. Pareho silang duha mga anak ug presidente sa mga dagko nga mga grupo sa isla. Ang Indonesia ug Pilipinas parehas nga grupo lamang sa mga isla. Ang ilang mga amahan parehas napildi sa pagkapresidente neadtong 1965 ug parehas pa gayud nga ang nakapildi mga dictador. Parehas sila nga dunay tulo ka mga anak. Ug parihas pa gayud nga ang ilang mga bana napuno sa kontrobersya. Parehas pa gayud nga mibisita sa Washingtong niadtong unang tuig sa ilang pwesto ug Ilang gibisitaan si Pres. George Bush nga anak usab ug kanhiay nga presidente nga milingkod usab isip presidente niadtong 2001.
Nagsabot man tingali ni sila mga higala? Ambot kaha no.
Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

Sto. Niño

2008-09-05T17:46:00.001-07:00

Sayud ba kamo mga kaigsoonan nga ang Sto. Nino mao kini ang representation sa Batang Jesus? Atong pagahisgutan mga higala ang Sto. Nino tungod kay bag-o lamang gisaulog ang kapistahan sa Senor Sto. Nino Didto sa Sugbo. Matud pa mga kaigsoonan ang Sto. Nino susama kini sa imahen sa batang Jesus didto sa Prague ang ciudad capital sa Czech Republic. Kining maong imahen sa Sto. Nino mga kaigsoonan nadala kini diri sa Pilipinas panahon sa pag tuyok ni Ferdinand Magellan sa kalibutan niadtong 1521. Ang maong imahen nahatag kini sa Reyna Juana sa Cebu nga nabaptismohan sa pagkakristyano kauban ang iyang bana nga si Rajah Humabon ug ilang mga sakop.
Matud pa mga kaigsoonan, ang Sto. Nino usa ka milagroso. Daghan na kaayong mga sugbohanon nga nabati ang pagkamilagroso niini. Matud pa usahay ang sanina sa sto. Nino inig kabuntag duna kini mga namilit nga amorsiko ug ang sapatos niini hugaw ug nagkalapok mao rag gikan kini sa layong panaw. Nakit-an pa gayud sa mga kastila nga layko ang mga tunob niini. Hangtud karon ang tibuok kalibutang kristiano nahibaw-an nga ang maong imahen usa ka milagroso.
Kini na usab ang inyong higala sa kahanginan si Sol Diaz muingon nga ang tawong dunay kasayuran adunay padulngan. Daghang Salamat.

Ang Musikiro gamit ang dahon

2008-09-05T17:44:00.001-07:00

Sayod ba kamo mga kaigsoonan adunay usa ka Filipino nga misikat tungod sa iyang talagsaong talento. Nahabutang pa gayod ang maong Pilipino sa Guinnes Book og World Records. Ang maong Filipino mao si Levi Celerio. Sya lamang ang usa ka tao nga motukar ug sonata gamit ang dahon. Ug dili lang basta nga sonata, nindot nga sonata.

Si Celerio mipakita sa iyang talento didto sa TV show nga “That’s Incredible ug sa Mel Griffin Show didto sa Amerika. Usa sya ka composer ug manunulat sa kanta sobra 4,000 ka kanta.

Natawo sya niadtong April 30, 1910 sa tondo Manila ug namatay sa sakit niadtong april 2, 2002.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

Ang Babae nga dunay 3,400 ka paresan sa sapatos

2008-09-05T17:41:00.000-07:00

Sayod ba kamo mga kaigsoonan nga Kanhi Unang Ginang Imelda Marcos nalista sa sa Guinnes Book of World Records isip usa ka babaye nga adunay pinakadaghan ug collection sa sapatos. Matud pa sa taho sa dihang ang pamilyang marcos milupad ngadto sa Hawaii niadtong People Power Revolution sa tuig 1986, nakaplagan sa usa ka lawak sa Malacanang ang 3,400 ka paresan sa sapatos. Matud pa collection kadto sa kanhiang Unang Ginang.

Niadtong tuig 1987, si Imelda nipahimakak ug miingon nga duna lang kuno siya’y 1,060 ka paresan sa sapatos. Ang kanhiay nga unang ginang adunay sukod sa tiil nga otso ug tunga ka pulgada. Miingon pa gayod sya nga daghan sya ug sapatos pero dili kuno kini sembolo sa pagkaboraska kun dili iya lamang gipadayag ang iyang gugma ug pagdayeg sa mga binuhat Pilipinhon nga sapatos tungod kay ang iyang 200 ka paresan sa sapatos pinalit kini niya sa Marikina. Ang maong 200 ka sapatos gi-display karon sa museum sa mga sapatos sa Marikina city.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

Inventor sa Moon Buggy

2008-09-05T17:22:00.000-07:00

Sayod ba kamo nga ang mga Filipino mikosiderar nga si Eduardo San Juan mao ang inventor sa Lunar Rover kun sakyanan sa bulan? Gitawag usab kini ug Moon Buggy. Ang Moon Buggy mga kaigsoonan mao kini ang gisaksan ni niel Armstrong ug uban pang mga astronaut niadtong mibuhat sila ug exploration didto sa bulan niadtong tuig 1969. Si Eduardo San Juan migraduar sa Mapua Institute of Technology didto sa kaulohan ug mitrabaho sa Lockheed Corporation diin didto nahimugso sa iyang hunahuna nga modesenyo ug usa ka Moon buggy diin gigamit kini sa mga Apollo astronaut samtang naa sila sa bulan. Si San Juan usa ka enginero sa NASA ug nataho kini nga gigamit ni ang iyang pagka pilipinhong kutikutihon aron siya makabuhat ug usa ka sakyanan nga mudagan sa gawas sa kalibutan. Sayod usab kamo nga gibuhat ni niyan butanga pinaagi sa mga pangbalay nga kahimanan lamang. Si San Juan midawat ug award isip usa sa mga 10 outstanding men sa syensya ug teknolohiya.

Apan mga kaigsoonan, si San Juan wala malista isip usa ka inventor sa moon buggy sa American Scientific Journals. Ug giingon pa gayod nga ang moon buggy giimbento ug gibuhat sa gropu sa mga space engineers. Ang nakapait pa gayud mga kaigsoonan, kay wala pa gayud sya malista isip usa ka outstanding Filipino Scientist sa National Academy of Science and Technology.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

Inventor sa Incubator

2008-09-05T17:18:00.001-07:00

Sayod ba kamo mga kaigsoonan nga pinakaunang Asiano nga Misulod sa pinakasikat nga skwelahan sa medisina didto Universidad sa Harvard ngadto sa Estados Unidos usa ka Filipino? Si Fe Del Mundo, mga kaigsoonan, tungod sa iyang pagtuon misangkot kini sa pagimbento ug incubator. Diin hangtud karon ang maong incubator ginagamit pa sa atong mga hospital aron ang usa ka bata nga natawo sa dili insakto sa bulan mabuhi sa normal nga bulan. Si Del mundo mga kaigsoonan, natawo didto sa Manila niadtong Nobembre 27, 1911. Usa usab ka graduado sa medisina didto Universidad sa Philippinas niadto 1940. Daghan usab siya ug mga nadawat nga awards gikan sa International Pediatric Association, Elizabeth Blackwell, ug Ramon Magsaysay Award tungod sa iyang maanindot nga pagpanerbisyo sa katawhan.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.

video of the invention

2008-09-05T16:54:00.000-07:00

Sakyanan nga ang Tubil Tubig

2008-09-05T16:47:00.000-07:00

Sayud ba kamo mga kaigsoonan nga sobra na sa tulo ka dekada ang milabay diin si Daniel Dingel miangkon nga mahimo niyang padaganon ang usa ka sakyanan pinaagi sa pagtubil ug tubig? Usa ka artikulo ang gipagawas sa Philippine Daily Inquirer diin misugilon si Dingel nga gibuhat niya kining makinaha gikan pa niadtong 1969. Matud pa si Dingel nagbuhat ug usa ka sakyanan nga naggamit ug battery nga 12 bolts diin bahinon ang tubig sa duha ka elementong hydrogen ug oxygen. Ang hydrogen mao gilayon ang buhatong ug gahum sa pagpaandar sa makina.

Matud pa ni Dingel nga daghan na kaayong langyaw’ng kumpanya sa sakyanan nga mihatag ug interes sa iyang invention pero ang Department of Science of Technology kun DOST miingon nga ang iyang invention usa lamang ka dakong bakak. Busa misumbalik si Dingel sa pag-ingon nga gidaut lamang sya sa DOST inubanan sa dagkong mga kumpanya sa Lana. Pero dili lamang si Dingel ang mitesting sa tubig aron kini mamahimong tubil sa sakyanan. Si Rudolf Gunnerman ug Stanley Meyer ug ang mga researcher sa Departamento sa Enerheya didto sa Amerika mipahigayon ug mga experimento niini.

Kini na usab ang inyong higala sa kahanginan si Sol Erwin Diaz muingon nga ang tawong dunay kasayuran adunay padulngan. Daghang Salamat.